පසුගිය සතියේ ශ්රී ලංකාවේ බොහෝ ප්රදේශවලට මෙන්ම කොළඹ අග නගරයටද මහ වැස්සෙන් හා ගංවතුරෙන් කරදර ඇති විය. යළිත් වරක්, යහපත් ජලාපවහනයක් පවත්වාගෙන යෑම හා ගංවතුර පාලනය වැනි මාතෘකා එළියට ආවේය. භූගෝලීය පිහිටීම අනුව ශ්රී ලංකාව අධික වර්ෂාපතනයකට උරුමකම් පායි. ජන හා සංඛ්යාලේඛන වාර්තා අනුව ශ්රී ලංකාවේ සාමාන්ය වාර්ෂික වර්ෂාපතනය මි.මී. 2,000ක් පමණ වන අතර, ජල ඝන මීටර් බිලියන 130ක් පමණ හැම අවුරුද්දේම අහසින් ලක් පොළොවට කඩාවැටේ.

















